अहमदनगर जिल्ह्यातील शहरटाकळी (ता.शेवगाव) येथील संतोष गादे या अल्पभूधारक शेतकऱ्याचा संघर्ष रंजक आहे. अल्प शेतीमुळे शेती पूरक व्यवसायाचा शोध घेणाऱ्या संतोष यांनी डाळनिर्मिती आणि त्यापुढे जात अथक अनुभवातून डाळ मिल यंत्रे तयार करण्यास सुरुवात केली. काळानुसार नवे तंत्रज्ञान व विविध वैशिष्टयांचा समावेश करीत यंत्रउदयोगाचा ‘ज्ञानेश्वरी’ ब्रॅंड त्यांनी लोकप्रिय केला आहे.
      अहमदनगर जिल्ह्यातील शेवगाव तालुक्यातील शहर टाकळी येथे संतोष व संदीप हे गादे बंधु राहतात. संतोष यांचे पदवी पर्यंत शिक्षण झाले आहे. संदीप सेतु केंद्र चालवतात. कुटुंबाला केवळ एक एकर जमीन. मात्र तेवढयावर कुटुंबाची गुजराना करणे शक्य होत नव्हते . त्यामुळे संतोष यांनी शेवगाव तालुका खरेदी-विक्री संघात सचिव म्हणून नोकरी केली. मात्र व्यवसाय सुरू करून त्यात प्रगती करायची त्यांची इच्छा होती. नोकरी सांभाळून आपल्या शेतातील भाजीपाला विक्रीही ते स्वत: करीत असतं .